بصراحه انا عامله المدونه دي من فترة بس مفيش وقت احط فيها اي حاجه
لكن لما عرفت عن الموضوع دة قلت بس ومالو اما اكتب عنو
مع انى مليش في الكتابه اصلا ... حتى طول عمرى مكنتش بحب التعبير
بس بما ان كل الناس بتدون يعني هيا جت عليا انا :)
المهم الموضوع ان واحد بيحب واحدة تقريبا كدة والله اعلم حصل بينهم زعل قام علشان يصالحها قام حاطط يافطتين كبااار واحدة على
كوبري 6 اكتوبر مكتوب فيها
You never know, it's maybe your fate
That we meet in our special spot
Kobri el Moneeb, I just love it a alot
Remember last time, it's the same place
Come right now if you want to see my face
That we meet in our special spot
Kobri el Moneeb, I just love it a alot
Remember last time, it's the same place
Come right now if you want to see my face
ولما هيا بقى تروح لبقعتهم المفضله على كوبري المنيب تلاقى اليافطه التانيه
اللى مكتوب فيها بالعربي تتجوزيني
زي ما احنا شايفين في الصورة فوق
بجد عجبتنى
عارفين ليه
تخيلت شعور هانيا حبيبته لما تشوف اليافطه دي هيكون رد فعلها ايه
مع ان شفت في مدونات كتير ان الناس مدايقه من الفكرة
لكن بجد
لو انت مكان مكان حبيب هانيا وشغلك اتاح لك فرصه انك تعمل حاجه زي كدة ومش هتتكلف غير التكاليف بس بعض النظر عن هيا كام
مش هتفرح حبيبتك كدة
ولو انتى هانيا شخصيا
ولقيتي الشخص اللى نفسك ترتبطى بيه عملك كدة
شعورك هيكون ايه ؟؟
ملحوظه : الصور من مدونه ميشيل
8 comments:
صراحه حركه جميله
سلام عليكم
بصى يا فندم أعتقد لو مكانه أو لو مكانها أكيد دا شئ جميل و يسعدنى بس طبعا بلدنا لها تقاليد و أعراف ما ينفعش تخرج عنها .... و أكيد زى ما حضرتك قلتى الكل إستهجن الفكره و لكن مش مهم كل دا لأن الصوره دى معموله لشخص بعينه و أعتقد إنه ما فكرش غير فى سعادتها هى بغض النظر عن كل قيل و قال .. و أرجع أقلك شكلهم بيتفرجوا على أفلام أمريكانى كثير خصوصاً فيلم anger management لأن كان فيه فكره مشابهه إنه عمل زى إعلان فى إستاد كبير مليان جماهير إنه عاوز يتجوز أم الخير
و دمتم بخير
anonymouse
هيا فعلا الحقيقه عجبتنى انا كمان
منور مرة تانيه يا د عماد
هو فعلا انا شايفه انو مكنش يقصد القيل والقال هو حس ان دي حاجه تفرحها فقرر يفرحها
وعلى فكرة انا مشفتش الفيلم اللى حضرتك بتتكلم عنه
لكن نفس الفكرة معموله في فيلم عربي كان بطوله هانى سلامه وحلا شيحا
وبردو حطلها يافطه في الشارع
وبعدين لو حد امكايناته بسيطه وعايز يبسط ام الخير
يجيب يافطه قماش من بتاعه الانتخابات :)
اهى اي حاجه تسد الغرض
ودمتم بخير
ماهو حتى فيلم هانى سلامة وحلا شيحا اللى كان اسمه السلم والثعبان مسروق اصلا من فيلم اجنبى ..
اما حكاية ان الفكرة كويسة او مستفزة فده ميفرقش معايا كتير .. لانها هتضايق ناس كتير وهتعجب بعض الناس لان عقولنا مش واحدة طبعا .. انا اللى يهمنى فى الموضوع هو .. هل ياترى الست هانيا رضيت تتجوزه ولا الراجل كع الخمسة وتلاتين الف جنيه على الفاضى ؟؟
والله انا بردو نفسي اعرف
بس متهيألى انها وافقت
انا لو مكانها الحقيقه هوافق :)
يا ريت بعد كدة يعلقوا يافطه يقولوا ايه اللى حصل
بس انا سمعت ان حكايه 35 الف دي واسعه شويه
وانو عملها بواسطه تبع شغله ومتكلفش غير تكاليف الطباعه اتكلفت كام بقى الله اعلم
فكرة غريبه جدااااااا
بس لوهنتكلم من الناحية الدينية فطبعا ليست من الاسلام فى شئ لانها بدعه
بس انا لو مكان هانيا هاخاف لانه هيكون انسان متهور وجرئ لدرجه مخيفه
ميرسى على الموضوع ام نرمين
اهلا بيكي يا شيكو
بصى يا ستى من الناحيه الدينيه دي مش بدعه ولا حاجه
البدعه هيا اللى تكون في حاجه تمس الدين
زي مثلا حد يكون صايم بدل ما يكون الفطار عند آذان المغرب
هو يقول لا انا هفطر عند آذان العشا طمعنا فى زيادة الثواب
هيا دي البدعه
لكن فيما يخص الامور الدنيويه فهى ليست ببدعه
اما حكايه كونه جرئ ومتهور
انا عن نفسي بحب الراجل يكون كدة
ومتخافيش المتهور بيعقل بعد الجواز :)
Post a Comment